كتالوج بُكا
شعر: ميسرة صلاح الدين، مصر
منابع جرحنا المفتوح
بتسقي الورد في بابل
وفرس النهر
بيعكنن على الهكسوس
في ليل طيبة
وأنا وأنت
يدوب ظِلّ لحُسام مكسور
صباح الخير
صباح النور
لكن ما طلعش من المصباح
كلام يتقال
روافد جرحنا السّيّال
على آخر حصون عكّا
خيول غزّة
وشِعاب مكة
وعظمة مجدنا المِتهان
بقيت كتالوج
بُكا وأحزان
حمام زاجل
بيتدبح بإيد صياد
مشاعره رخام
وواقفة الدنيا بتمصمص شفايفها
بكل براءة واستسلام
